ភ្នំពេញ៖ នាយករដ្ឋមន្ត្រីកម្ពុជា សម្តេចតេជោ ហ៊ុន សែន បានបង្ហាញការព្រួយបារម្ភចំពោះតារាចម្រៀង ពិធីករ និងពិធីការិនីដែលសម្តែង និងផឹកភេសជ្ជៈនៅក្នុងកម្មវិធីប្រគុំតន្រ្តីរបស់ភេសជ្ជៈណាមួយហើយមានជំងឺទឹកនោមផ្អែម។
នាពិធីបិទសន្និបាតក្រសួងសុខាភិបាលលើកទី៤២ នៅសណ្ឋាគាររ៉េស៊ីដង់សុខាភ្នំពេញ នារសៀលថ្ងៃទី៧ ខែមីនា ឆ្នាំ២០២៣ សម្តេចតេជោបានណែនាំដល់តារាចម្រៀង ពិធីករ និងពិធិការិនីដូច្នេះថា៖ «សូមផ្តាំទៅក្មួយៗអ្នកចម្រៀង ក៏ដូចជាពិធីករ និងពិធិការិនី ត្រូវភ្លក់ឱ្យគេ គឺគ្រាន់តែលើកទៅបានហើយ ក្មួយៗកុំទៅលេបអី គឺច្រើនមុខណាស់ មិនដឹងថាថ្ងៃក្រោយទៅកើតអីទេ»។
ជាមួយគ្នានេះនាយករដ្ឋមន្ត្រីកម្ពុជា សម្តេចតេជោ ហ៊ុន សែន បានប្រាប់ដល់ក្រសួងសុខាភិបាល សហការជាមួយក្រសួងនិងស្ថាប័នពាក់ព័ន្ធ ត្រូវជំរុញការផ្សព្វផ្សាយ និងអប់រំដល់ពលរដ្ឋហាមបរិភោគអាហារដែលបង្កផលប៉ះពាល់ដល់សុខភាព៕
